Yn ddiweddar daeth aseswyr o Dîm Cymru Iach ar Waith Llywodraeth Cynulliad Cymru ar yweliad ag Ysgol Aberconwy i gynnal arolwg o ddau faes allweddol y safon, sef cefnogaeth sefydliadol a materion iechyd penodol. Yn dilyn yr arolwg, dyfarnwyd Gwobr Arian y Safon Iechyd Corfforaethol i'r ysgol.

Cydnabu'r aseswyr y newidiadau sydd wedi digwydd dros y pum mlynedd diwethaf, rôl y Pennaeth wrth arwain y newid, a'r penderfyniad i roi pobl yn gyntaf drwy gynnwys myfyrwyr a staff nid yn unig o fewn cwmpas polisïau ond hefyd mewn amrywiaeth eang o weithgareddau a mentrau i gefnogi iechyd a lles.

Mae’r Safon Iechyd Corfforaethol yn daith barhaus o arfer da a gwelliant, a gellir ei ddefnyddio fel offeryn i gefnogi datblygiad polisïau sy’n hybu iechyd a lles gweithwyr. Mae'r safon yn cael ei mesur ar ddwy agwedd, sef cefnogaeth sefydliadol sy'n ystyried ethos a diwylliant mewn sefydliad ac yn edrych ar feysydd fel ymrwymiad lefel uwch, ymgysylltiad gweithwyr a rheoli iechyd a diogelwch. Mae'r ail agwedd, materion iechyd penodol, sy'n edrych ar reoli materion afiechyd y gellir eu hatal yn y gweithle, yn canolbwyntio ar feysydd fel iechyd meddwl a lles, diet a gweithgarwch corfforol.

Tynnodd yr adroddiad sylw at lawer o fanteision yn Ysgol Aberconwy o ran y Safon Iechyd Corfforaethol, er enghraifft, penodi Cydlynydd Lles a'r pwyslais ar ddiogelwch, iechyd a lles sy’n amlwg drwy’r ysgol ac yn ein perthynas waith agos â Sodexo. .

Dywedodd Rhydian Jones, Cydlynydd Lles Ysgol Aberconwy, “Rydw i wrth fy modd fel ysgol ein bod wedi ennill y wobr Arian. Rydw i’n hapusach fyth gyda'r ffaith mai ni yw’r ysgol uwchradd gyntaf yng Nghymru i gyflawni'r statws hwn. Mae'n dangos yr ymrwymiad clir a chryf sydd gennym yn yr ysgol i iechyd a lles myfyrwyr a staff.”

“Fel ysgol rydym yn cymryd iechyd a lles o ddifrif ac rwy'n falch o weld y gwaith caled gan staff a myfyrwyr wedi cael ei wobrwyo gyda chyflawniad Gwobr Arian Iechyd Corfforaethol. Yn awr rydym am anelu am y wobr platinwm, a byddwn fel un tîm yn gweithio tuag at hyn, tra'n dilyn ein harwyddair lles ysgol, sef ein bod ni’n gweithio'n dda pan ydym yn dda i weithio” ychwanegodd Ian Gerrard, y Pennaeth.

Yn dilyn proses ymgeisio heriol a thrwyadl, dewiswyd tri myfyriwr o Ysgol Aberconwy i dderbyn Gwobr fawreddog Cwmni Anrhydeddus Urdd Lifrau Cymru ar gyfer Ysgolion. Ddydd Gwener, Ebrill 12fed cyflwynodd Jean Bryson eu gwobrwyon i Nina Rowlands (Blwyddyn 9), Edward Griffith (Blwyddyn 10) a Geneva Henson (Blwyddyn 10), yn dilyn cyfweliadau ffurfiol a gynhaliwyd ym mis Chwefror 2019.

Sefydlwyd Cwmni Anrhydeddus Urdd Lifrau Cymru i hyrwyddo addysg, celfyddydau, gwyddoniaeth a thechnoleg a thrwy gyfrwng eu gwobrwyon gallant ddatblygu talentau pobl ifanc ledled Cymru. Esboniodd Jean Bryson, “Byddem fel arfer yn dewis dau fyfyriwr i ennill y wobr, ond oherwydd safon uchel iawn y ceisiadau eleni, fe benderfynon ni ddyfarnu gwobrau i dri myfyriwr. Mae'n bleser gennyf gyflwyno eu gwobrau i'r myfyrwyr hyn, nid yn unig y bydd hyn yn helpu gyda'u haddysg bresennol ond bydd yn eu gosod ar y trywydd iawn ar gyfer y dyfodol sydd o'u blaenau hefyd.”

Cyflwynwyd tystysgrifau mewn ffrâm i bob myfyriwr a chawsant wobr ariannol i gynorthwyo gyda’u hanghenion addysgol parhaus. Fe wnaethon ni ddal i fyny gyda’r myfyrwyr hynny i ddarganfod sut maen nhw'n bwriadu gwario'r arian a gawsant.

 “Rwyf wrth fy modd fy mod wedi derbyn £250 a byddaf yn ei ddefnyddio i brynu gitâr Electro-Acwstig. Bydd y gitâr hon, ynghyd â’m hyfforddiant lleisiol parhaus yn rhoi hwb pellach i’m hyder, ac yn fy ngalluogi i deimlo’n fwy cyfforddus wrth berfformio o flaen gwahanol gynulleidfaoedd” meddai Edward.

Yn y cyfamser, dywedodd Nina wrthym ei bod yn bwriadu rhoi’r arian tuag at brynu gliniadur newydd. “Rydw i wrth fy modd fy mod wedi cael fy newis i dderbyn £125 a byddaf yn ei ddefnyddio i brynu fy ngliniadur fy hun. Bydd cael fy ngliniadur fy hun yn golygu y gallaf gario llai o lyfrau a bydd hefyd yn gyswllt â’m cyfrif ysgol, sy’n golygu y gallaf orffen gwaith ysgol gartref, gan y bydd gennyf fynediad llawn i Office 365.”

Ychwanegodd Geneva, “Rwy’n ddiolchgar iawn am gael derbyn £125 a byddaf yn ei wario ar diwtor preifat ar gyfer mathemateg i’m helpu i wella fy ngraddau ymhellach a rhoi mwy o hyder i mi yn y pwnc hefyd!”

Yn dilyn cyflwyno’r gwobrau dywedodd Mr Ian Gerrard, y Pennaeth, “Rwyf yn hynod falch ein bod wedi derbyn nid dwy wobr ond tair eleni, i fyfyrwyr sydd wedi dangos agwedd weithgar a chydwybodol tuag at eu hastudiaethau. Fel bob amser, mae’n bleser mawr cael gweithio gyda Jean a’r Urdd ac rydym yn hynod ddiolchgar am y cyfle maen nhw wedi’i roi i’n myfyrwyr.”

Yn Ysgol Aberconwy rydym yn falch o weld bod y ffeithiau yn y ffigurau. Mae’r ystadegau a ryddhawyd yn ddiweddar gan ‘Fy Ysgol Leol’ yn dangos bod y cynlluniau a roddwyd ar waith yn yr ysgol eisoes yn dangos gwelliannau sylweddol i’n perfformiad yn gyffredinol.

Mae’r wefan ar gyfer Fy Ysgol Leol, a ddarperir gan Lywodraeth Cymru, wedi’i chynllunio i roi’r gallu i rieni, warcheidwaid ac eraill sydd â diddordeb yn eu hysgol leol gael mynediad i ddata ysgol a rhannu gwybodaeth am berfformiad yr ysgol. Mae hyn yn darparu ffynhonnell wybodaeth dryloyw ac agored sydd ar gael yn eang i bawb, gan alluogi defnyddwyr i groesgyfeirio perfformiad ysgolion lleol yn eu hardal hwy.

Yn Ysgol Aberconwy, rydym wrth ein bodd gyda’n safle fel un o’r ddwy ysgol uwchradd cyfrwng Saesneg uchaf yng Nghonwy, gyda phresenoldeb ein myfyrwyr y gorau yn y sir a nifer y myfyrwyr sy’n cyflawni 5A*/A ar lefel TGAU yn uwch nag erioed.

Nid yn unig hynny, ni hefyd yw’r unig ysgol uwchradd yng Nghonwy gyda 100% o fyfyrwyr yn cyflawni o leiaf pum TGAU (A*-G). Yn ogystal, mae tri chwarter o’n myfyrwyr yn cyflawni trothwy lefel 2 (pum TGAU A*-C) gyda dros hanner o’r rhain yn cynnwys Saesneg/Cymraeg a Mathemateg TGAU.

Mae ein canlyniadau arholiad ynghyd â’r sylwadau a wnaed gan Estyn yn eu harolwg diweddaraf o’r ysgol yn dangos ein bod ar y trywydd iawn yma yn Ysgol Aberconwy. Nododd yr arolygwyr yr “ethos cynhwysol, cefnogol a meithringar” yr ydym yn ei ddarparu yma yn yr ysgol, sy’n cael “effaith fuddiol sylweddol ar les a datblygiad personol disgyblion”. Os ychwanegir at y sylwadau hyn ein cred ddiysgog bod myfyrwyr yn ffynnu mewn amgylchedd cefnogol, trefnus sy’n cyfuno gwerthoedd traddodiadol ag adnoddau cyfoes, mae’r holl dystiolaeth yn dangos llwyddiant cynyddol yr ysgol.

Dywedodd Mr Gerrard, y Pennaeth “Rydym yn falch iawn o’n myfyrwyr a’u cyflawniadau. Fe’u disgrifiwyd fel myfyrwyr cwrtais a pharchus ac mae ganddynt agwedd gadarnhaol tuag at ddysgu. Rydym yn cydnabod yr angen i sicrhau bod gan ein myfyrwyr y sgiliau sydd eu hangen arnynt yn y byd modern ac yn ceisio eu harwain ar y llwybr i fod yn unigolion hapus a hyderus drwy gyfuniad cytbwys o brofiadau a chymwysterau.

Gan symud ymlaen fel ysgol, byddwn yn parhau i weithio ar gynllun datblygu’r ysgol, gyda chymorth rhieni, gofalwyr, myfyrwyr a staff, wrth i ni ymdrechu i fyw ein cenhadaeth i ysbrydoli, cefnogi a llwyddo.”

I gael rhagor o wybodaeth am Fy ysgol Leol, ewch i: http://mylocalschool.wales.gov.uk/?lang=en

Mae Cerys Eless, sydd ar hyn o bryd yn astudio ar gyfer BTEC mewn Cerddoriaeth Boblogaidd yn Ysgol Aberconwy, wedi cael ei dewis i berfformio’n fyw yn Ffocws Cymru, gŵyl arddangos ryngwladol sy’n ffocysu ar dalent newydd, ym mis Mai eleni. Yn ogystal â hynny, yn ddiweddar bu’n recordio dwy o’i chaneuon newydd a ddarlledwyd ar y radio, ac mae wedi sicrhau lle iddi hi ei hun yn Sefydliad BIMM mawreddog Manceinion!

Bu gan Cerys ddiddordeb yn ngherddoriaeth er pan oedd yn ifanc iawn, gan ysgrifennu caneuon pan oedd yn 11, a pherfformio’n fyw yn 15 oed. Erbyn hyn, mae i’w chlywed ar radio cenedlaethol, a phwy a ŵyr lle gallai hyn fynd â hi nesaf. Ym mis Medi 2019 bydd yn cychwyn ar ddiploma ysgrifennu caneuon yn BIMM, a chyda’i ffocws a’i hymroddiad bydd hyn yn hwb mawr i’w gyrfa o fewn y diwydiant cerddoriaeth.

Mae Cerys eisiau dilyn gyrfa yn gwneud yr hyn mae’n ei garu. Disgrifir ei cherddoriaeth fel cymysgedd o gerddoriaeth boblogaidd indie a’r enaid, gyda pheth blws hefyd ac mae’n tynnu ar ei dylanwadau cerddorol i’w hysbrydoli i greu caneuon newydd. Meddai Cerys, “Yr amser gorau i greu cân newydd yw pan fydd fy emosiynau’n rhemp. Y peth gorau yw cyfeirio emosiwn cignoeth drwy ysgrifennu caneuon, mae’n rhaid i chi ei wneud ar y funud a pheidio colli’r cyfle, achos weithiau dyma pryd rydych chi’n creu eich darnau gorau.” Pan nad yw’n ysgrifennu ei chaneuon ei hun, mae wrth ei bodd yn gwrando ar Adele, Sam Smith, Ed Sheeran, Emeli Sande a Lewis Capaldi.

Mae Cerys nid yn unig yn jyglo bywyd fel person ifanc yn ei harddegau a myfyriwr gyda gwyliau ysgol a dreulir mewn stiwdios recordio lleol, ond hefyd bu’n westai ar Calon FM (Wrecsam) lle perfformiodd ddwy o’i chaneuon newydd, un o’i EP presennol, a sgwrsio â Pete Rogers am ei pherfformiad arfaethedig yn Ffocws Cymru. Nid Calon FM yn unig sydd wedi sylwi ar ei thalent, gan fod Adam Walton hefyd wedi chwarae tri o’i thraciau gwreiddiol, gan gynnwys un o’i chaneuon newydd, ‘Emotionally Unattached’ i’w wrandawyr ar ei raglen gyflwyno nos Sadwrn ar BBC Radio Wales.

Fe wnaethom ddal i fyny â Cerys i weld beth mae’n edrych ymlaen ato fwyaf yn y dyfodol. Dyma oedd ganddi i’w ddweud …

“Wrth i mi baratoi ar gyfer Ffocws Cymru rwy’n dechrau teimlo cymysgedd o nerfau a chyffro ond mae’n siŵr bod hynny’n normal. Rwy’n edrych ymlaen at fynd ar y llwyfan a pherfformio fy nghaneuon o flaen cynulleidfa fwyaf fy ngyrfa gerddorol hyd yma.

Mae’r teimlad rwy’n ei gael wrth berfformio ar lwyfan yn anhygoel ac rwyf eisiau profi’r profiad hwn bob dydd, gan berfformio o flaen gwahanol gynulleidfaoedd fel eu bod nhw’n gallu clywed beth ydw i a beth sydd gen i i’w gynnig.

Rwy’n ffodus o gael fy nheulu a’m ffrindiau o’m cwmpas gan eu bod nhw’n fy nghefnogi a galla’i ddim diolch digon i fy nhad, gan mai ef yw’r un sy’n mynd â fi i’m holl wersi, gigiau a chlyweliadau.

Rydw i mor gyffrous ynglŷn â dechrau yn BIMM fis Medi, gan mai hwn yw fy nghyfle i ffocysu ar wneud yr hyn rwy’n ei garu a mynd â’m gyrfa gerddorol i’r lefel nesaf!”

Dywedodd Andrew Umpleby, athro Cerddoriaeth Boblogaidd Ysgol Aberconwy, “Mae pawb ohonom yn falch iawn o lwyddiannau Cerys hyd yma. Mae ganddi allu naturiol i ysgrifennu a pherfformio a chydag ychydig o gymorth bydd yn mynd yn bell. Mae’n gyfnod cyffrous i Cerys a’i theulu a fedrwn ni ddim aros i weld beth sy’n dod nesaf iddi.”